Дэлгэж тавьсан дэвтрийнхээ хуудас нэг бүрээр
Дэвэрч булгилах сэтгэлийнхээ учиг бүрийг нээе
Дээврээс нисэх тагтаанд захиа дайдгийн адилаар
Дэвтрээр би чамдаа зүрхний үгсээ илгээе
Итгэж чадахгүй эргэлзээ бүрийг арилгах гэж
Энэ л дэвтэртээ үнэн үгсээ бичье
Эвлэрч үерхэх хүсэл бүхнээ шивнэж
Ийм л нэг дэвтрийг чиний зүг нисгэе
Хайргүй юм бол намайг битгий өрөвд
Хамаагүй ээ энэ дэвтэрт бас бич
Хагацал дагуулах нулимстай үгс байсан ч
Хайр шингээсэн зүрхний үг бүрээ
Халтар дэвтэрт минь бичиж үлдээгээч
Ханилж хоёул хамт байж чадахгүй байсан ч
Хамтдаа энэ орчлонг хөтлөлцөн туулсан ч
Хожмын нэг өдөр дэлгэн нэг дурсая
Хонгор сэтгэлийн гүнд уусаж нэг саная
Хэзээ нэгэн өдөр дундаа дэлгэн сууя
Хэнзхэн нэгэн дурлалыг дурсаж нэг саная
Шууданч цагаан тагтаанд захидал дайдгийн адил
Шулуун яруу үгсээ бичиг болгож илгээгээч
Шугамтай дэвтрийн хуудсаар дамжуулж
Шүлэг, захиагаар сэтгэлээ нээгээч
